ကြားကာလဖက်ဒရယ်သူနာပြုနှင့်သားဖွားကောင်စီက ဝန်ကြီးဌာနများနှင့် တွေ့ဆုံ ဆွေးနွေး အကြံပြုချက်များရယူခြင်း

၂၀၂၄ ခုနှစ်၊ မတ်လ ၄ ရက်

၂၀၂၄ ခုနှစ်၊ မတ်လ ၃ ရက်နေ့တွင် ကြားကာလဖက်ဒရယ်သူနာပြုနှင့်သားဖွားကောင်စီက အမျိုးသားညီညွတ်ရေးအစိုးရ၊ ကျန်းမာရေးဝန်ကြီးဌာန၊ ပညာရေးဝန်ကြီးဌာန မှ ပြည်ထောင်စုဝန်ကြီး၊ ဒုတိယဝန်ကြီးများ၊ ဖက်ဒရယ်ကျန်းမာရေးပညာရှင်များကောင်စီဥက္ကဌ၊ ဝန်ကြီးဌာန ၂ ခုမှ တာဝန်ရှိဆရာ၊ဆရာမများနှင့် တွေ့ဆုံပြီး IFNMC ၏ မျှော်မှန်းချက်၊ ရည်မှန်းချက်များ၊ လုပ်ငန်းစဥ်များနှင့် လက်ရှိကာလတွင် လုပ်ဆောင်နေသည်များကို တင်ပြ၍ အကြံပြုမှုများရယူခဲ့ကြပါသည်။

အစည်းအဝေးတွင် ကျန်းမာရေးဝန်ကြီးဌာနနှင့် ပညာရေးဝန်ကြီးဌာနမှ ပြည်ထောင်စုဝန်ကြီး ဒေါက်တာဇော်ဝေစိုး၊ ပညာရေးဝန်ကြီးဌာနမှ ဒုတိယဝန်ကြီး ဒေါက်တာစိုင်းခိုင်မျိုးထွန်း၊ ဖက်ဒရယ်ကျန်းမာရေးပညာရှင်များကောင်စီ ဥက္ကဌ ဒေါက်တာခင်မောင်လွင်၊ ကချင်ပြည်နယ်ပညာရပ်စုံတက္ကသိုလ်-သူနာပြုတက္ကသိုလ်မှ ကျောင်းအုပ်ကြီး Prof: Alice တို့က အဖွင့်အမှာစကားပြောကြားခဲ့ပါသည်။

ဆက်လက်၍ ကြားကာလဖက်ဒရယ်သူနာပြုနှင့်သားဖွားကောင်စီ ဒုဥက္ကဌမှ နှုတ်ခွန်းဆက်စကားပြောကြားပြီး IFNMC ဖွဲ့စည်းပုံ၊ မျှော်မှန်းချက်၊ ရည်မှန်းချက်များ၊ လုပ်ငန်းစဥ်များ၊ လက်ရှိကာလလုပ်ဆောင်နေမှုများ၊ ရေးဆွဲထားသည့် Professional Code of Conduct for Nurses and Midwives နှင့် Standards for Program Accreditation (Under-Grade Program) များအား တင်ပြခဲ့ကြပါသည်။

တင်ပြမှုများပြီးနောက် ကျန်းမာရေးဝန်ကြီးဌာန၊ ပညာရေးဝန်ကြီးဌာနနှင့် FHPC မှ တာဝန်ရှိသူများက အကြံပြုဆွေးနွေး၍ ဝန်ကြီးဌာနလုပ်ငန်းများမှ သူနာပြုနှင့်သားဖွားရေးရာကိစ္စများတွင် IFNMC ၏လုပ်ငန်းစဥ်နှင့်သက်ဆိုင်သည့် အခန်းကဏ္ဍများအတွက် ပူးပေါင်းညှိနှိုင်းဆောင်ရွက်သွားရန်၊ IFNMC အနေဖြင့်လည်း ERO များနှင့်ဆက်လက်တွေ့ဆုံရန် အကြံပြုဆွေးနွေးပေးခဲ့ကြပါသည်။

ထို့နောက် IFNMCမှ ဆရာမတစ်ဦးကကျေးဇူးတင်စကားပြောကြားပြီး FHPC ဥက္ကဌနှင့် ကျန်းမာရေးနှင့်ပညာရေးဝန်ကြီးဌာနမှ ပြည်ထောင်စုဝန်ကြီး တို့က နိဂုံးချုပ်စကားပြောကြား၍ အစည်းအဝေးကို ရုတ်သိမ်းခဲ့ပါသည်။